ہوا میں پھرتے ہو کیا حرص اور ہوا کے لیے

Rhyme: ا

Poetic form: Ghazal

غرور چھوڑ دو اے غافلو خدا کے لیے

گرا دیا ہے ہمیں کس نے چاہ الفت میں

ہم آپ ڈوبے کسی اپنے آشنا کے لیے

جہاں میں چاہیئے ایوان و قصر شاہوں کو

یہ ایک گنبد گردوں ہے بس گدا کے لیے

وہ آئینہ ہے کہ جس کو ہے حاجت سیماب

اک اضطراب ہے کافی دل صفا کے لیے

تپش سے دل کا ہو کیا جانے سینے میں کیا حال

جو تیرے تیر کا روزن نہ ہو ہوا کے لیے

طبیب عشق کی دکاں میں ڈھونڈتے پھرتے

یہ دردمند محبت تری دوا کے لیے

جو ہاتھ آئے ظفرؔ خاک پائے فخراؔلدین

تو میں رکھوں اسے آنکھوں کے توتیا کے لیے

Conversation

Reader comments

Add context, ask a question, or respond thoughtfully. Comments may be moderated.