ایک بچہ اور جگنو کی باتیں

سناؤں تمہیں بات اک رات کی

کہ وہ رات اندھیری تھی برسات کی

چمکنے سے جگنو کے تھا اک سماں

ہوا پر اڑیں جیسے چنگاریاں

پڑی ایک بچہ کی ان پہ نظر

پکڑ ہی لیا ایک کو دوڑ کر

چمکدار کیڑا جو بھایا اسے

تو ٹوپی میں جھٹ پٹ چھپایا اسے

وہ جھم جھم چمکتا ادھر سے ادھر

پھرا کوئی رستہ نہ پایا مگر

تو غمگین قیدی نے کی التجا

اے چھوٹے شکاری مجھے کر رہا

خدا کے لئے چھوڑ دے چھوڑ دے

مری قید کے جال کو توڑ دے

کروں گا نہ آزاد اس وقت تک

کہ میں دیکھ لوں دن میں تیری چمک

چمک میری دن میں نہ دیکھو گے تم

اجالے میں ہو جائے گی وہ تو گم

ارے چھوٹے کیڑے نہ دے دم مجھے

کہ ہے واقفیت ابھی کم تجھے

اجالے میں دن کے کھلے گا حال

کہ اتنے سے کیڑے میں کیا ہے کمال

دھواں ہے نہ شعلہ نہ گرمی نہ آنچ

چمکنے کی تیرے کروں گا میں جانچ

یہ قدرت کی کاریگری ہے جناب

کہ ذرہ کو چمکائے جوں آفتاب

مجھے دی ہے اس واسطے یہ چمک

کہ تم دیکھ کر مجھ کو جاؤ ٹھٹک

نہ الھڑ پنے سے کرو پائمال

سنبھل کر چلو آدمی کی سی چال